फर्टिलिटी अवेअरनेस – ओळख आपल्या पाळीचक्राची

3 5,656

मासिक पाळी कधी येणार किंवा अन्डोत्सर्जन कधी होणार हे आपलं आपल्याला समजू शकतं असं तुम्हाला जर कुणी सांगितलं तर तुमचा विश्वास बसेल? किंवा मासिक पाळीच्या चक्रामध्ये गर्भधारणा नेमकी कधी होऊ शकते हे कोणत्याही वैद्यकीय तपासणीशिवाय समजू शकतं हे तुम्हाला खरं वाटेल का?

हे पूर्ण खरं आहे. आपल्या मासिक पाळीच्या चक्रात काय होतंय, गर्भधारणा कधी होणार असं सगळं आपल्याला समजू शकतं.  फर्टिलिटी अवेअरनेस म्हणजेच जनन जागरुकता हे स्वतःचं शरीर, संवेदना आणि शरीराच्या प्रतिक्रिया समजून घेण्याचं एक कौशल्य आहे. स्वतःच्या शरीरातले सूक्ष्म बदल आणि खुणा, जाणिवा, भावना आणि संवेदना समजून घेणं, स्वतःची लैंगिकता आणि जननक्षमता याबाबत जागरुक असणं म्हणजे फर्टिलिटी अवेअरनेस किंवा लैंगिकता व जनन जागरुकता.

मासिक पाळी चक्रामध्ये होणारे विविध बदल आणि जाणिवांमधून कोणत्या काळात गर्भ धारणा होऊ शकते म्हणजेच दिवस जाऊ शकतात आणि कोणत्या काळात नाही हे समजून घेता येतं. तसंच शरीरात, पाळी चक्रात, संप्रेरकांच्या चक्रात काही वेगळं घडत आहे का तेही या जागरुकतेमुळे समजत असतं. पाळी चक्रामध्ये अंडोत्सर्जन झालं का नाही, पुढची पाळी कधी येणार आणि दिवस गेले आहेत का हेही लवकर समजू शकतं.

या ज्ञानातून आपण आपल्या शरीराबद्दलचे आणि आपल्या लैंगिकतेसंबंधीचे निर्णय स्वतः घेऊ शकतो. शरीराबद्दलची अनेक मिथकंही यातून दूर करता येतील. आपली लैंगिकता समजून घेऊन इतरांबरोबरची आपली नाती आपण मोकळेपणाने जोडू शकतो. गर्भनिरोधनामध्ये आणि गर्भधारणेमध्ये पुरुषांचाही महत्वाचा वाटा आहे आणि याबद्दलची त्यांची जबाबदारी पुरुष घेऊ शकतील.

आपल्या शरीराची, पाळीचक्राची आणि जननचक्राची ओळख कशी करायची ते पुढच्या लेखात.

 

3 Comments
  1. sidhdartha dadaji ghutke says

    ‘मासिक पाळीचक्रात नेमकं काय घडतं?’ हे समजून घेण्यासाठी तथापिची निर्मिती

  2. Raj says

    Sir plz tell me……majya gf sobt mi sex Kel but sor bhaher kadl aatmde nhi ….ani sex kelyantr 10 divasni Pali regular date la Ali….pn pudchi Pali one week jhal Ali nhi …tr pregnancy asel Ka. Plz past

    1. let's talk sexuality says

      एखाद्या वेळी असे झाले तर काळजी करण्याचे काहीच कारण नाही. (मात्र प्रत्येक वेळी नेहमीपेक्षा १५ दिवस लवकर पाळी येत असेल तर डॉक्टरांचा सल्ला घेणे योग्य) पाळी चुकण्याची, लवकर येण्याची किंवा लांबण्याची अनेक कारणं आहेत. ताण-तणाव, वजन कमी असणे, अत्याधिक व्यायाम, खूप कष्टाची कामं, अत्याधिक प्रवास, कुपोषण किंवा स्त्रीच्या शरीरात बीज निर्मिती आणि पाळीचक्रावर प्रभाव टाकणाऱ्या काही विशिष्ट संप्रेरकांशी (हार्मोन्स) संबंधित समस्या अशी अनेक कारणं पाळी वेळेवर न येण्याला कारणीभूत असू शकतात.

      काही वेळा आजारी असल्यामुळे औषधं चालू असतात त्याचा परिणाम पाळी चक्रावर होतो. अंडोत्सर्जन लांबतं आणि त्यामुळे पाळीदेखील उशीरा येते. काही वेळा अंडोत्सर्जंन होण्यामध्ये काही समस्या असल्यास पाळी नियमित येत नाही. वर म्हटल्याप्रमाणे कसलं टेन्शन असेल, मानसिक ताण असेल तरी पाळी लांबू शकते. खूप प्रवास, दगदग यांचाही पाळी चक्रावर परिणाम होत असतो.
      अधिक माहितीसाठी – http://letstalksexuality.com/menstrual-and-fertilitycycle/ आणि http://letstalksexuality.com/menstrual-cycle-length/ हे वाचा.

      टेन्शन घेण्याचं कारण नाही. मात्र पाळी नियमित न येण्याचं कारण शोधणं गरजेचं असतं. आणखी एक, जर पाळीची तारीख उलटून गेली असेल तर सर्वात आधी एक करा, दिवस गेले आहेत का याची खात्री करा. प्रेग्नन्सी टेस्ट करण्यासाठीची किट बाजारात मिळतात. त्यावरील सूचनांप्रमाणे लघवीची तपासणी केली तर दिवस गेले आहेत का हे समजू शकेल. जर टेस्ट निगेटिव्ह असेल तर थोडे दिवस पाळीची वाट बघा (मसिक पाळीचे चक्र नियमित असेल). पॉसिटीव्ह असेल तर तर स्त्रीरोगतज्ज्ञांना भेटा आणि तपासणी करा. आपल्या शरीराविषयी आपणच जास्त जागरूक होणं आवश्यक आहे.

Leave A Reply

Your email address will not be published.

This site uses Akismet to reduce spam. Learn how your comment data is processed.