धक्कादायक! चाइल्ड पॉर्नोग्राफीची २५ हजार प्रकरणं उघड

महाराष्ट्रात एकूण १७०० प्रकरणं समोर आली आहेत

2,077

चाइल्ड पॉर्नोग्राफीशी संबंधित धक्कादायक आकडेवारी समोर आली आहे. अमेरिकेनं यासंबंधीचा अहवाल भारताकडे सोपवला आहे. या अहवालानुसार, भारतात गेल्या पाच महिन्यांत २५ हजारांहून अधिक चाइल्ड पॉर्नोग्राफीचे व्हिडिओ विविध सोशल मीडिया साइट्सवर अपलोड करण्यात आले आहेत. अमेरिकेच्या नॅशनल सेंटर फॉर मिसिंग अँड एक्सप्लॉयटेड चिड्रेन (एनसीएमइसी) कडून भारताच्या नॅशनल क्राइम रेकॉर्ड्स ब्युरोकडे हा डेटा देण्यात आला आहे. अशा प्रकारची माहिती देता यावी यासाठी गेल्या वर्षी सांमज्यस्य करार करण्यात आला होता.

एका इंग्रजी दैनिकाच्या रिपोर्ट्सनुसार, यातील सर्वाधिक प्रकरणं ही दिल्लीतील आहेत. त्यानंतर महाराष्ट्र, गुजरात, उत्तर प्रदेश, पश्चिम बंगालमध्ये चाइल्ड पोर्नोग्राफीचे व्हिडिओ सोशल मीडियावर अपलोड केले जातात. प्रत्येक राज्यातील आकडेवारी स्वतंत्रपणे देण्यात आली नाही; परंतु महाराष्ट्रात एकूण १७०० प्रकरणं समोर आली आहेत. ती सायबर विभागाकडे पाठवण्यात आली आहेत. तर उर्वरित राज्यांमध्येही साधारण अशीच परिस्थिती आहे.

गृहमंत्रालयातील अधिकाऱ्यांच्या माहितीनुसार, हा अहवाल समोर आल्यानंतर देशभरात अटकसत्र सुरू करण्यात आलं आहे. एनसीएमइसीसोबत गेल्या वर्षी करार करण्यात आला होता. त्यामुळं भारताला अशा प्रकारची माहिती देण्यात येत आहे. २३ जानेवारीपर्यंत गेल्या पाच महिन्यांत चाइल्ड पॉर्नोग्राफीची २५ हजार प्रकरणं उघडकीस आली आहेत. अशा प्रकारचा डेटा शेअर करण्याची ही पहिलीच वेळ आहे, असं एका महाराष्ट्रातील अधिकाऱ्यानं सांगितलं.

मुंबईत ५०० प्रकरणं

अधिकाऱ्यानं दिलेल्या माहितीनुसार, ही माहिती संबंधित विभागांकडे पाठवण्यात आली आहे. आतापर्यंत सात गुन्हे दाखल करण्यात आले आहेत. तर अद्याप काही दाखल करायचे आहेत. मुंबई, ठाणे, पुण्यात अशा घटना सर्वाधिक उघडकीस आल्या आहेत. मुंबईत ५०० प्रकरणं आहेत. दिल्ली, गुजरात आणि केरळमध्ये याआधीच कारवाईला सुरुवात झाली आहे.

चाइल्ड पॉर्नोग्राफी ‘कशी’ ठरवली जाते?

ही माहिती गोळा करण्यासाठी खबरे, इंटरनेट सर्व्हिस देणारे आणि काही सॉफ्टवेअरची मदत घेतली जाते. नग्नता आणि मुलांच्या चेहऱ्यांवरील हावभाव या आधारे व्हिडिओ तपासणीसाठी फॉरवर्ड केले जातात. पॉक्सो अॅक्टमध्ये चाइल्ड पॉर्नोग्राफी अंतर्गत फोटो, व्हिडिओ, डिजिटल किंवा संगणकाच्या साह्यानं तयार केलेले छायाचित्र, जे बालकांची आहे, किंवा जे छायाचित्र मॉडिफाइ करून वास्तविक मुलांसारखी वाटणे आदी गोष्टींचा समावेश होतो.

चित्राचा व बातमीचा स्त्रोत : https://maharashtratimes.indiatimes.com/india-news/over-25000-cases-of-child-pornography-in-last-5-months-in-india-says-usa-report/articleshow/73687855.cms

 

Comments are closed.