मित्रा, तुझा प्रश्न महत्वाचा आहे. लिंगाच्या आकाराबद्दल अनेक मुलांच्या मनामध्ये न्यूनगंड असतो. अगदी तुझ्यासारखा दिसणारा दुसरा कोणी मुलगा तुला आत्तापर्यंत भेटला आहे का? किंवा अगदी स्वभावानं, रंगानं आणि अंगानं सारख्याच असणार्या दोन व्यक्ती तू पाहिल्या आहेत का? जर उत्तर नाही असेल तर हे समजून घे की प्रत्येकजण वेगळा आहे. प्रत्येकाच्या शरीराची बांधणी वेगळी आहे. शरीराची बांधणी तुमच्या अनुवांशिक गुणसूत्रांनुसार, भौगोलिक परिस्थितीनुसार बदलत असते. त्यामुळं कोणाचं लिंग लहान मोठं असणं यात तुझा नक्कीच काही दोष नाही. हे लक्षात घे, लिंगाच्या आकाराबाबत कोणतही शास्त्रीय प्रमाण नाही. दुसरं महत्वाचं म्हणजे लिंगाचा आकार आणि लैंगिक सुख यांचा काही संबंध नाही. लैंगिक सुखाचा आनंद घेण्यासाठी इतरही काही गोष्टी महत्वाच्या असतात. त्यामुळं लिंगाच्या आकाराबद्दल न्यूनगंड किंवा गैरसमज मनातून काढून टाक.

आता तू विचारलेल्या दुसर्या प्रश्नाकडं वळू या. ज्यावेळी लैंगिक भावना उद्यपित होतात त्यावेळी लिंगामध्ये रक्तप्रवाह वाढून लिंगामध्ये ताठरता येते. ज्यावेळी लैंगिक भावना उद्यपित नसतात त्यावेळी लिंगाचा आकार कमीच असतो. हा काही आजार नाही. मात्र तुमच्या जांघेमध्ये जो त्रास होत आहे त्याबद्दल डॉक्टरांचा सल्ला घेतलेला बरा.